Velkomen til Sogn kulturskule
Me er ein interkommunal kulturskule for kommunane Luster og Sogndal, men me har også elevar frå Lærdal, Årdal, Aurland og Vik. Hovudbasen vår er i Sogndal kulturhus, men me har undervisning ein rekkje stader frå Balestrand til Skjolden.
Aktuelt
I vår har vi hatt fleire huskonsertar på Sogn kulturskule. Huskonsertane skal vera eit lågterskeltilbod for alle elevar som vil øva seg på å opptre, og ein arena for å komma i lag og visa kvarandre kva vi har jobba med. Måndag 4. mai hadde vi tredje og siste huskonsert for dette semesteret.
Tweenskoret på Sogn kulturskule har jobba mot eit samarbeidsprosjekt med Sogndal og Leikanger skulemusikk. Det har vore mange timar med øving på songar av artisten Aurora.
Sogn og Fjordane-kappleiken 2026.
13. og 14. mars fekk folkemusikken og folkedansen frå Sogn og Fjordane skine på Sogn og Fjordane-kappleiken, den årlege tevlinga i tradisjonelt spel, song og dans. Arrangørane Sogn spel- og dansarlag og Jostedal spel- og dansarlag kan verkeleg nyte all heider og ære etter eit knirkefritt arrangement på Grand Hotel Skei. Krudlalaget var representert både på opningskonserten fredag og på Smørbukk-kappleiken (kappleik for born) laurdagen. På opningskonserten song Amanda som er elev på individuell folkesong i lag med fem elevar frå Krudlalag på Kaupanger og Hafslo; Oda Linette, Emma, Mari, Frida og Sandra. Dei to siste fekk også ringja i Kappleiks-klokka for å opna kappleiken.
Mari, Frida og Sandra var også med laurdagen, i lag med Johanna, Endre, Thale, Live Magdele og Leon, så alle Krudlalag-gruppene var representerte, både Leikanger, Sogndal, Kaupanger og Hafslo. Lærarane som driv med folkemusikk; Kari og Marin var også deltakande i fleire ulike innslag under helga.
Kappleiken husa totalt 222 tevlande deltakar, fordelt på 78 startnummer. I tillegg kjem publikum og dansande, som bidrog til eit hotell fullt av liv denne helga. Særleg på Smørbukk-kappleiken, for dei minste, var kappleiksarenaen smekk full av born og publikum. Heile 81 born og unge var med på scena for å vise sine dugleikar på fele, hardingfele, trekkspel, innan folkesong eller folkedans eller songdans. Frå Sogn kulturskule, i tillegg til elevar frå Krudlalaget var det fleire av våre elevar på song, fele og hardingfele som deltok. Mellom andre Elsa, Ela, Ingeborg, Johanna og Anna Liv. Vi er veldig stolte over elevane våre!
Etter å ha sunge fekk alle premiar (godteri og diplom), og då alle deltakarane hadde vore i elden vart Smørbukk-kappleiken avslutta med song og dans, leia av Kari Malmanger og Mari Andrea Ness. Ei fin, inkluderande og samlande avslutning.
Det var kjempekjekt å vera på kappleik, kjenna på god stemning og treffa glade kjente, og andre som brenn for folkemusikken. Å vera med på kappleik er verkeleg å anbefala for alle, uansett kva instrument ein spelar eller kor gammal ein er. Det er gøy!
Konsertar